22.03.2012
Fundir framundan.  Aðalfundur Framfara verður haldinn í Þelamerkurskóla, þriðjudaginn 27. mars og hefst kl. 20:00  Venjuleg aðalfundarstörf.  Kaffi og terta í boði félagsins.  Þá verður aðalfundur HEÞ haldinn í Funaborg, miðvikudaginn 11. apríl kl. 20:00

02.02.2012
Ræktunarhátíð Framfara
Næsta laugardag (04.02.) verður Ræktunarhátíð Framfara haldin að Melum í Hörgárdal og hefst kl. 21.  Þar verða ræktendum 24 hrossa veittar viðurkenningar í hrossaræktinni en þessi hross náðu öll 8,0 eða hærra í aðaleinkunn kynbótadóms á árunum 2010 opg 2011 og eiga það sameiginlegt líka að vera ræktuð af félagsmönnum í Framfara.  Venju samkvæmt býður Framfari upp á léttar veitingar, eitthvað fyrir munn og maga, óáfenga drykki bæði heita og kalda og naslerí sem hæfir því. Gestum er velkomið að taka með sér söngvatn :o)
Stefán Tryggvi Brynjarsson stígur á stokk, Olla á Björgum þeytir skífum og leikurinn "maður er manns gaman" verður síðan í hávegum hafður fram eftir kveldi. Aðgangur ókeypis og frjálst að taka með sér gesti á meðan húsrúm leyfir :o)  Sjáumst öll kát og glöð á Melum á laugardagskvöldið kl. 21:00

Dagur með hrossaræktarráðunauti
Föstudaginn 17. febrúar mun HEÞ standa fyrir námskeiðinu "Dagur með hrossaræktarráðunauti" í TopReiterhöllinni á Akureyri. Guðlaugur Antonsson hrossaræktarráðunautur BÍ mun fara yfir helstu atriði sem lögð eru til grundvallar við einkunnagjöf í kynbótadómum bæði í bygginu og hæfileikadómi. Nokkur hross verða sýnd og gefst þátttakendum kostur á að dæma hrossin og bera saman við tölur ráðunautarins. Námskeiðið er frá kl. 10-17. Þátttökugjald er kr. 4.000,- á mann og innifalið í því er léttur hádegisverður á staðnum. Framfari greiðir þetta námskeið niður um 2.000,- fyrir sína félagsmenn og hvetjum við alla sem tækifæri hafa á að nýta sér námskeiðið, bæði til fróðleiks og eins ekki síður skemmtunar. Við skráningum á námskeiðið tekur Vignir Sigurðsson á Búgarði í netfang vignir@bugardur.is og í síma 460-4477. Síðasti skráningardagur er þriðjudagurinn 14. febrúar.

27.01.2012
Folaldasýning Framfara fór fram í dag í TopReiterhöllinni á Akureyri. 27 folöld tóku þátt og urðu úrslit dagsins þannig:
Hestfolöld:
1. Neisti frá Garðshorni, F. Glymur frá Innri-Skeljabrekku.  Eig. Áskell Ólafsson
2. Loki frá Litlu-Brekku, F. Pistill frá Litlu-Brekku. Eig. Vignir og Jónína
3. Taktur frá Draflastöðum, F. Prins frá Úlfljótsvatni. Eig. Tobbi og Þura
Merfolöld:
1. Berglind frá Skriðu, F. Gaumur frá Auðsholtshjáleigu. Eig. Þór og Sigga
2. Prinsessa frá Neðri-Rauðalæk, F. Kopar frá Hvanneyri. Eig. Sumarliði og Stefanía
3. Demba frá Skriðu, F. Hlekkur frá Lækjamóti. Eig. Þór og Sigga
Flottasta folaldið (valið af áhorfendum):
Jöfn að stigum urðu þau Berglind frá Skriðu og Loki frá Litlu-Brekku.  Berglind hampaði verðlaununum eftir hlutkesti.  Vegleg verðlaun voru í boði frá Fákasporti, Líflandi, VB-landbúnaði og Bústólpa.  Þökkum styrktaraðilum kærlega fyrir stuðninginn.

20.01.2012
Jæja, þá förum við að síga á stað í nýja árið.

Folaldasýning
Folaldasýning Framfara verður haldin í TopReiterhöllinni á Akureyri, laugardaginn 28. jan n.k. og hefst kl. 12:00. Sýningin verður með sama sniði og verið hefur, keppt í flokkum hestfolalda og merfolalda. Dómnefnd velur 3 efstu folöldin í hvorum flokki og eins munu áhorfendur velja "flottasta folaldið". Skráningargjald á folald er 500 kr. Veitingasala á staðnum og eins og flestir vita er mjög góð aðstaða fyrir áhorfendur. Tekið við skráningum til kl. 22 föstudagskvöldið 27. jan (til að folöldin nái að prentast í skrá). Skráningar skulu sendar á netfang fornhagi@fornhagi.is (Anna Guðrún) eða axelgrettisson@n1.is (Axel) Hægt er að greiða inn á reikn. 0302-26-4210 kt. 421007-1950 Hrossaræktarfélagið Framfari, eða á á staðnum (ekki posi).

01.12.2011
Ungfolarnir sóttir í stóðhestahólfið að Staðarbakka.  15 folar voru í hólfinu, 11 veturgamlir og 4 tveggja vetra.

24.11.2011
Það voru félagsmenn Framfara, þeir Haukur og Þorri á Ytri-Bægisá I, sem hlutu titilinn "Ræktunarbú ársins 2011" á haustfundi HEÞ sem fram fór í Ljósvetningabúð í kvöld.  Tekið af www.hryssa.is : Ræktunarbú HEÞ 2011 er Ytri-Bægisá I í Hörgársveit. Þar á bæ stunda hrossarækt þeir Haukur Sigfússon og Þorvar Þorsteinsson. Á þessu ári voru sýnd þrjú hross frá búinu í kynbótadómi. Meðaleinkunn sýndra hrossa var 8,13 og var meðalaldur þeirra 6 ár. Tvö af þeim hlutu 8,0 eða hærra í aðaleinkunn. Langefstur í þeim hópi er stóðhesturinn Stáli frá Ytri-Bægisá sem hlaut 8,41 í aðaleinkunn á Landsmótinu á Vindheimamelum sl. sumar. Ræktendur á Ytri-Bægisá hafa um nokkura ára skeið stundað farsæla hrossarækt þar sem áhersla er lögð á gæði umfram magn.

09.07.2011
Bjargaleikarnir voru afskaplega vel heppnaðir í blíðviðri í dag.  Góð þáttaka og eftirtaldir bæir og fyrirtæki hlutu farandgripi Framfara til varðveislu til eins árs:

Pollaflokkur - Skriða, Þór og Sigga
Barnaflokkur - Dagverðareyri, Jóhannes og Seselía
Unglingaflokkur - Hlaðir, Klængur
Bændaflokkur - Litla-Brekka, Vignir og Jónína
Kvennaflokkur - B. Jensen
Karlaflokkur - Skjaldarvík, Óli og Dísa

06.07.2011
Bjargaleikar framundan!  Næsta laugardag fara fram okkar árlegu Bjargaleikar.  Leikarnir hefjast kl. 13:00  Keppt verður í flokkum bænda, karla, kvenna, unglinga, barna og polla og einnig í skeiði.  Í pollaflokki má teyma undir svo að allir litlir hestamenn geta tekið þátt. Skráning á staðnum, engin skráningargjöld, Ollubúð opin og þetta getur ekki annað en verið uppskrift að góðum degi.  Sjáumst á laugardaginn :D

04.07.2011
Reiðnámskeið hófst í dag á vellinum á Björgum á vegum Framfara.  Kennari er Veronika Gspandl og eru 11 börn í tveimur hópum á námskeiðinu.

23.06.2011
Stóðhestum sleppt í hólf á Staðarbakka.  Alls fóru 14 hestar í hólfið, 10 veturgamlir og 4 tveggja vetra.  Einum veturgömlum fola var svo bætt við um miðjan júlí og eru þeir nú 15 alls, 11 veturgamlir og 4 tveggja vetra.

25.03.2011
Kíkið á stóðhest sumarsins - Klett frá Hvammi.

03.03.2011
Aðalfundur Framfara verður haldinn þriðjudaginn 08. mars n.k. kl. 20:30.  Fundurinn verður haldinn í matsal Þelamerkurskóla.  Á dagskrá eru venjubundin aðalfundarstörf.  Félagar hvattir til að mæta.  KAffi og meðlæti í boði Framfara.  Stjórnin.

11.01.2011
Engin folaldasýning verður haldin á vegum Framfara nú í janúar sökum stöðu í hestapestarmálum.  Ákvörðun þess efnis miðast af því að ekki þykir forsvaranlegt að stefna saman svo mörgum hrossum úr mismunandi hópum, sem geta auðveldlega borið með sér nýtt smit.  Eins fyrir bændur á Björgum sem eru með fjölda hrossa á húsi, getur það verið auðveld smitleið í húsið.  Ræktunarhátíðinni okkar, sem vanalega er líka á þessum tíma, verður frestað fram á veturinn og auglýsum við hana síðar.

11.11.2010
Stóðhestaumræðufundur Framfara verður haldinn á Búgarði, þriðjudagskvöldið 16. nóv. n.k. kl. 20:30  Kaffi og hnallþórur í boði félagsins.  Á þennan fund hefur alltaf verið góð mæting og vonumst við eftir að það verði nú sem áður.

18.08.2010
Stjórn félagsins ákvað að aflýsa öllum hrossauppákomum það sem eftir er árs.  Ástæðan er hestapestin afdrifaríka.  Dreifibréf þess efnis var sent í Hörgársveit og einnig tölvupóstur til félagsmanna.  Félagið hvetur um leið félagsmenn sína að fylgjast vel með  hrossum sínum nú þegar kuldi og bleyta fara að gera útigangshrossum lífið erfiðara. 

21.06.2010
Í dag fór Hrímnir frá Ósi í hryssur að Ytri-Bægisá á vegum Framfara.  Fullt er hjá hestinum en hann verður hjá okkur í 6 vikur frá og með dags. í dag.

20.06.2010
Ungfolum sleppt fram á Staðarbakka.  Í kvöld voru 14 ungfolar settir í hólf að Staðarbakka.  Þó nokkur afföll voru frá pöntuðum plássum en 13 veturgamlir og einn tveggja vetra foli fóru í hólfið.

10.06.2010
Hrímnir frá Ósi, sem verður stóðhestur Framfara sumar 2010, hækkaði mikið í kynbótadómi á dögunum.  Hann fékk m.a. 9,5 fyrir tölt og brokk og 9,0 fyrir stökk, vilja og geðslag og fegurð í reið.  Hrímnir fer í hólf að Ytri-Bægisá nú í lok júní og fullpantað er undir hann.

30.04.2010
Mistök við innheimtu félagsgjalda Framfara
Þau leiðu mistök urðu hjá Arionbanka við innheimtu félagsgjalda Framfara, fyrir árið 2010, að tvennskonar greiðsluseðlar voru sendir á þá félagsmenn sem eru annars vegar skráðir á makagjaldi eða félagar 70 ára og eldri.  Arionbanki hefur leiðrétt mistökin í heimabönkum en félagar sem fengu tvo greiðsluseðla eiga að greiða lægri seðilinn og farga hinum.  Hafi félagsmenn fyrir mistök greitt hærri seðilinn skulu þeir snúa sér til Önnu Guðrúnar s: 893-9579 og netfang fornhagi@fornhagi.is  um úrlausn sinna mála.

08.04.2010
Félagsgjald Framfara verður óbreytt á milli ára.  Því var ekki hægt að lenda fyrr en það lá ljóst fyrir hjá HEÞ hvaða gjald þeir myndu taka til sín.  Gíróseðlar verða sendir út á næstu dögum.

29.03.2010
Breytingar hjá Framfara.
Stjórn Framfara tók breytingum á síðasta aðalfundi. Smellið á krækjuna til að sjá nánar.
Félagatal Framfara hefur nú verð uppfært.  Eftir aðalfund eru félagar 129 talsins.
Lögum félagsins hefur verið breytt.  Þar var 6.gr laga breytt samkv. fundarboði. Skoðið það nánar.

29.03.2010
Aðalfundur HEÞ verður haldinn í Ljósvetningabúð, þriðjudagskvöldið 6. apríl n.k. kl. 20:00.  Á dagskrá eru venjuleg aðalfundarstörf. Kjósa skal tvo menn í stjórn til þriggja ára og tvo varamenn til eins árs. Allir félagar hafa seturétt, málfrelsi og tillögurétt á aðalfundi. Atkvæðisrétt hafa stjórnarmenn samtakanna, formenn deilda og að auki einn fulltrúi fyrir 1-20 félaga, 2 fulltrúa fyrir 21-40 félaga o.s.frv Félagsmenn eru hvattir til að mæta og taka þátt í málefnum félagins.
Stjórn HEÞ.

23.03.2010
Aðalfundur Framfara fór fram í Leikhúsinu á Möðruvöllum í kvöld.  6.gr. í lögum félagsins var breytt og við það voru 6 félagar strikaðir út af félagatalinu vegna skulda.  Tveir til viðbótar hættu í félaginu og 18 nýir félagar gengu í félagið.  Eftir aðalfund eru Framfarafélagar því 129 og er það aukning um 10 á milli aðalfunda.  Við uppfærum félagatalið og lögin á næstu dögum félagsmönnum til upplýsinga.

16.01.2010
Úrslit folaldasýningar Framfara.
Folaldasýning Framfara fór fram á Björgum í dag.  Tæplega 80 folöld mættu til leiks og er það metþátttaka.  Dómarar voru þeir Erlingur Ingvarsson og Þórarinn Ingi Pétursson og kunnum við þeim bestu þakkir fyrir.  Brúni frá Möðrufelli var kosinn flottasta folaldið af áhorfendum. Þrjú efstu folöld úr hvorum flokki fyrir sig eiga svo þátttökurétt í Úrvalssýningu HEÞ og TopReiterhallarinnar, sem fram fer laugardaginn 23. jan n.k. Úrslitin voru eftirfarandi:

Hestfolöld:
1. Brúni frá Möðrufelli – brúnn
IS2009165-523
F. Gígjar frá Auðsholtshjáleigu (8,46)
M. Bón frá Tungu
Eig. Þorbjörn og Matthías, Möðrufelli

2. Bjartur frá Akureyri – rauður
IS2009165-980
F. Markús frá Langholtsparti (8,36)
M. Nótt frá Tungu (7,58)
Eig. Helga Árnadóttir, Akureyri

3. Gustur frá Skriðu – brúnn
IS2009165-304
F. Geisli frá Úlfsstöðum (8,0)
M. Kolbrún frá Skriðu
Eig. Davíð Sverrisson

Merfolöld:
1. Lilja frá Syðra-Brekkukoti – brúnskjótt
IS2009265-257265-333
F. Drangur frá Hjallanesi
M. Þyrnirós frá Dalsmynni
Eig. Albert Jensen, Syðra-Brekkukoti

2. Sóldögg frá Skriðu – svartskjótt
IS2009265-305
F. Moli frá Skriðu (8,21)
M. List frá Fellskoti (7,76)
Eig. Þór Jónsteinss. og Jón Páll Tryggvason

3. Skrautlist frá Akureyri - rauðskjótt
IS2009265-591
F. Hágangur frá Narfastöðum (8,31)
M. Myndlist frá Akureyri (8,0)
Eig. Sigurður Sveinn Ingólfsson, Akureyri

10.01.2010
Folaldasýning Framfara verður haldin á Björgum, laugardaginn 16.01.2010 og hefst kl. 13:00 - skráning hjá Önnu G. fram á föstudagskvöld (til kl. 21) í síma 893-9579 og í netfang agg@bondi.is  Sú nýbreytni er að tekið er skráningargjald kr. 500 á hvert folald.

Nýárshittingur Framfara verður sama dag, þ.e. um kvöldið, að Melum og hefst kl. 21:00.  Veitt verða ræktunarverðlaun Framfara, Sigurður Óskarsson verður með uppistand, fingramatur í boði Framfara og hver og einn sér um sín ölföng.  Gott að ljúka góðum degi á Melum og gleðjast saman á góðri stundu.

01.01.2010
Gleðilegt ár Framfarafélagar!

04.12.2009
Stóðhestur næsta sumars hjá Framfara verður Hrímnir frá Ósi IS2005165-247.  Gengið var til samninga við Sindra Þór Sverrisson, eiganda hestsins í dag, og mun Hrímnir verða hjá okkur í hólfi að Ytri-Bægisá I, sumarið 2010.  Hrímnir verður í hólfi eftir Landsmót með fyrirvara um að hann komist þangað inn.  Náist það takmark ekki verður hann í fyrra tímabili hjá Framfara.  Sjá nánar um Hrímni undir "Stóðhestur 2010"

23.11.2009
Haustfundur Framfara verður haldinn á Búgarði, fimmtudaginn 26.11 kl. 20:30
Umræðuefni fundarins eru stóðhestamál komandi sumars. Kaffi og terta í boði félagsins.  Félagsmenn hvattir til að mæta og láta sig málin varða.  Stjórnin.

21.11.2009
Ungfolarnir sóttir fram á Staðarbakka í góðu veðri.  Folarnir voru í mjög góðu standi og allt gekk þetta hratt og vel fyrir sig enda vaskur hópur sem hjálpaðist að við að lesta kerrur og reka saman. 

12.11.2009
Hrossaræktarbúið að Kommu var valið ræktunarbú ársins hjá Framfara.  Vilberg bóndi í Kommu er okkar maður hjá Framfara og óskum við honum sérstaklega til hamingju með árangurinn.  Komma var einnig tilnefnt á landsvísu yfir hrossaræktunarbú ársins. 

10.11.2009
Hinn árlegi Haustundur HEÞ verður að þessu sinni haldinn í Ljósvetningabúð 12. nóvember n.k. og hefst hann kl. 20:30. Á fundinum verður valið ræktunarbú ársins á félagssvæðinu. Eftirtalin bú eru tilnefnd (í stafrófsröð):

Efri-Rauðilækur
Grund II
Komma
Litla-Brekka
Torfunes

Auk þess munu ræktendur efstu hrossa í kynbótadómi hljóta viðurkenningar. Sú nýbreytni verður, að veita nú viðurkenningar fyrir efstu hross í hverjum aldursflokki.
Guðlaugur Antonsson, hrossaræktarráðunautur, fer svo yfir sviðið í hrossaræktinni. Kaffiveitingar í boði Samtakanna.

17.08.2009
Bjargaleikar færðir til um viku.
Hinir árlegur Bjargaleikar, sem vera áttu 22. ágúst nk. hafa verið færið til um viku og verða því laugardaginn 29. ágúst n.k. Reiðnámskeið verður haldið vikuna fyrir leikana og hefst mánudaginn 24. ágúst.  Dreifibréf verður sent út núna í vikunni til allra íbúa í Hörgárbyggð og Arnarneshreppi sem og til félaga í Framfara utan þess svæðis.

04.06.2009
Kaffireiðin Skriða-Melar-Skriða
Munið kaffireiðina á morgun, föstudag.  Riðið frá Skriðu kl. 20 í Mela og keypt kaffi af kvennfélagskonum þar.  Kaffið kostar 1.000,- á manninn og ekki er unnt að taka við greiðslukortum. Mætum tímanlega í Skriðu, hress og kát og allir með hjálm á höfði. Athugið að laus hross og hundar verða ekki leyfð í þessari reið.

01.06.2009
Gleðileikar Framfara - töltkeppni - fór fram á Björgum í kvöld.  Þátttakan var góð, líkt og í fyrra, en 33 skráningar voru í mótið og allir mættu til leiks. Nokkrir knapar mættu með fleiri en eitt hross í forkeppnina og þurftu því að velja á milli í úrslitin.  Riðin voru A- og B-úrslit, dómari var Lina Eriksson og á hún bestu þakkir fyrir dómstörfin sem og aðrir starfsmenn mótsins sem að sjálfsögðu unnu allt sitt í sjálfboðavinnu. Einkunnir hér að neðan eru úr forkeppni en í úrslitunum var raðað í sæti. Úrslitin voru eftirfarandi:

A-úrslit:
1. Þorbjörn Hr. Matthíasson og Ódeseifur frá Möðrufelli 7,5
2. Anna Catharina Gros og Glóð frá Ytri-Bægisá 7,0
3. Viðar Bragason og Spænir frá Hafrafellstungu 6,7
4. Þór Jónsteinsson og Hákon frá Hraukbæ 6,5
5. Ólafur Svansson og Fjöður frá Kommu 6,5
6. Atli Sigfússon og Stormur frá Ytri-Hofdölum 6,5
7. Inga Bára Ragnarsdóttir og Galgopi frá Hóli 6,2

B-úrslit:
7. Inga Bára Ragnarsdóttir og Galgopi frá Hóli 6,2
8. Helga Árnadóttir og Tinni frá Torfunesi 6,3
9. Guðmundur Karl Tryggvason og Tíbrá frá Tungu 5,8
10. Örvar Áskelsson og Randver frá Garðshorni 6,2
 

30.05.2009
Tenór hækkar enn!
Tenór frá Túnsbergi hækkaði í 9,5 fyrir tölt í dag á yfirlitssýningu í Hafnafirði og hlaut því 9,15 fyrir hæfileika og 8,61 í aðaleinkunn. Tenór setti með því heimsmet því hann mun vera hæst dæmdi stóðhestur í heiminum fyrir hæfileika. Frábær árangur og enn og aftur til hamingju Gunnar og Magga bændur í Túnsbergi.

28.05.2009
Töltmót á Björgum 1. júní
Næstkomandi mánudagskvöld, á annan dag Hvítasunnu, verður haldið töltmót á Björgum. Mótið hefst kl. 20:30 og verður keppt í einum opnum flokki. Riðið hefðbundið töltprógram (3 hringir þ.e. einn á hægu tölti og snúið við, þá einn hringur tölt með hraðamun á langhliðum og einn hringur greitt tölt), tveir verða inn á vellinum í einu og riðin verða A- og B-úrslit. Engin skráningagjöld, skráð á staðnum, eitthvað lítið um verðlaun en þeim mun meira um skemmtan. Þátttökurétt hafa allir íbúar í Hörgárbyggð og Arnarneshreppi sem og aðrir skráðir félagar í Framfara.

27.05.2009
Tenór yfir níu fyrir hæfileika.
Framfarahesturinn Tenór frá Túnsbergi, sem var í hólfi hjá okkur sl. sumar, hækkaði verulega í kynbótadómi í Hafnafirði í dag. Tenór hlaut 9,03 fyrir hæfileika og má því með sanni segja að nýfædd og ófædd folöld hér á svæðinu undan honum hafi aukið verðmæti sitt verulega og væntanlega kætt eigendur sína um leið. Dómur á Tenóri frá í dag (fyrir yfirlitssýningu):
Hæfileikar: Tölt: 9,0 Brokk: 9,5 Skeið: 9,0 Stökk: 8,0 Vilji og geð: 9,5 Fegurð í reið: 9,0
Fet: 6,5 (hægt tölt 9,0 hægt stökk 5,0)
Sköpulag: 7,78
Hæfileikar: 9,03
Aðaleinkunn: 8,53
Tenór hlaut því 9,5 fyrir brokk og vilja og geðslag. Í umsögninni um vilja og geð stendur "Fjör". Tenór hlaut 9,5 fyrir tölt 4v. og 5v. gamall í öll fjögur skiptin sem hann hefur verið sýndur utan í dag og því næstum víst að þar á hann inni fyrir yfirlitssýningu. Eins stökk, þar hefur hann hlotið 8,5 svo að það verður spennandi að sjá hvað hann gerir á yfirlitinu. Áhugasamir hrossaræktendur geta fylgst með yfirlitinu væntanlega í beinni útsendingu á www.hestafrettir.is á föstudag og laugardag. Yfirlit stóðhesta fer fram á laugardag (sjá nánar á www.bssl.is ).

30.04.2009
Innheimta félagsgjalda.
Á næstunni fá félagsmenn í póstkassann greiðsluseðla vegna árgjalda Framfara 2009. Gjaldið er það sama og í fyrra, þ.e. 6.000 kr. fyrir fulla aðild og 1.500 kr. fyrir maka. Það skal áréttað hér að innifalið í fullu félgasgjaldi er árs áskrift að Worldfeng (eða 300 heimsóknir, eftir því hvort kemur á undan). Nýtt Worldfengsár hefst 01. júní og þá lokast á aðgang þeirra sem ekki hafa greitt félagsgjaldið.

17.03.2009
Ríkarður Hafdal, formaður HEÞ
Aðalfundur HEÞ fór fram í kvöld í Hringsholti í Svarfaðardal. Þar urðu formannsskipti og tók okkar maður, Ríkarður Hafdal, við starfi formanns HEÞ í stað Baldvins Kr. Baldvinssonar sem gaf ekki kost á sér til áframhaldandi setu. Inn í stjórn HEÞ kom einnig Bjarni Páll Vilhjálmsson.

16.03.2009
Úttekt á hrossum fyrir "Fáka & fjör".
Sunnudaginn 29. mars kl. 14:00 á að taka út topp kynbótahross, gæðinga, stóðhesta og ræktunarbú fyrir sýninguna Fákar & fjör, en fyrir þá sem ekki vita er Fákar & fjör hestaveisla sem haldin verður á Akureyri í reiðhöll Léttis dagana 17. og 18. apríl n.k.  Hestaáhugamenn ættu allir að finna eitthvað við sitt hæfi á sýningunni en boðið er uppá fjölbreytt og skemmtileg sýningaratriði auk áhugaverðra fyrirlestra.  Þeir sem telja sig hafa eitthvað spennandi á sínum snærum og hafa áhuga á að vera með í þessari hestaveislu vinsamlegast hafið samband við Friðrik í síma 896-5309.

11.03.2009
Dræm fundarsókn - inntaka 32 nýrra félaga.
Aðalfundur Framfara fór fram í gær í Þelamerkurskóla.  Fundinn sóttu einungis 16 manns auk stjórnar og er það skammarlega léleg þátttaka í félagi sem telur nú rúmlega 120 félaga.  Hvað þarf að gera til að vekja áhuga félagsmanna á málefnum félagsins er ekki gott að segja. Á fundinum voru teknir inn 32 nýir félagar sem er algjör metaukning og um leið voru 5 félagar strikaðir út af félagatalinu, tveir að eigin ósk og þrír sökum skulda árgjalds.  Það fjölgaði því um 27 félaga á milli aðalfunda. Kíkið á félagatalið hér til hliðar, sem er nú uppfært eftir aðalfundinn.

04.03.2009
Sýningagjöld hækka.
Það var góður og skemmtilegur fundur í Hlíðarbæ í kvöld þar sem Gulli og Kristinn (sjá frétt hér neðar) stikluðu á því helsta í hrossaræktinni. Góð mæting var og ágætis umræður í lok fundar. Fram kom á fundinum að sýningargjöld kynbótahrossa munu hækka á árinu 2009 og kosta nú 13.500 að sýna hross í fullnaðardóm en 9.000 byggingadómur. Eins er við lýði 60 daga regla sem gefur sýnendum kost á því að mæta aftur með hross til dóms, án þess að fara aftur í byggingadóminn og láta hann því standa á milli sýninga.  Þetta á þó ekki við á vill vor og haustsýninga þó að færri en 60 dagar væru þar á milli.

25.02.2009
Fundur með Gulla og Kristni.
Miðvikudaginn 4.mars n.k. verður hrossaræktarfundur á vegum HEÞ í Hlíðarbæ þar sem þeir félagar Guðlaugur Antonsson, hrossaræktarráðunautur BÍ og Kristinn Guðnason, formaður FHB, fara yfir málefni hrossaræktarinnar. Fundurinn hefst kl. 20:30, kaffiveitingar í boði samtakanna og er fundurinn öllum opinn. Nú er tækifæri fyrir fróðleiksfúsa hrossaræktendur að soga í sig úr viskubrunnum þeirra félaga Gulla og Kristins.

21.02.2009
Fundarboð.
Aðalfundur Framfara verður haldinn í Þelamerkurskóla, þriðjudagskvöldið 10.03. kl. 20:30. Dagskrá nánar auglýst síðar.

20.02.2009
Á vef HEÞ www.hryssa.is má sjá auglýsta notkun á stóðhestum sumar 2009 þ.e. bæði deildahestum sem og hestum á vegum einstaklinga.

26.01.2009
Kíkið á "Viðburðir" þar er kominn linkur sem hægt er að smella á til að skoða yfirlit kynbótasýninga fyrir árið 2009 (birt með fyrirvara).

21.01.2009
Hækkun skráningargjalds á sölusíðu.
Vil vekja athygli á breytingu vegna sölusíðu Framfara.  Nú framvegis kostar kr. 1.500,- að skrá hross á síðuna (var áður 1.100,-). Þeir sem hafa áhuga á að koma hrossum inn á síðuna hafi samband við Önnu Guðrúnu í netfang fornhagi@fornhagi.is eða í síma 893-9579

20.01.2009
Aðall frá Nýjabæ
Kíkið á stóðhest sumarsins hjá Framfara - Aðal frá Nýjabæ

17.01.2009
Folaldasýning Framfara fór fram að Ytri-Bægisá I í dag. 65 folöld voru skráð til leiks og 64 þeirra mættu.  Frábær þátttaka - takk fyrir það kæru félagar. Efstu folöld í hvorum flokki voru undan hestagullinu Álfi frá Selfossi.  Í flokki hestfolalda sigraði Álmur frá Skriðu en hann er undan Dalrós (Mola frá Skriðu dóttur) frá Arnarstöðum og í flokki merfolalda sigraði Leynd frá Litlu-Brekku sem er undan Ásaþórsdótturinni Líf frá Litlu-Brekku. Álmur var einnig kosinn flottasta folaldið af áhorfendum sem voru rétt um hundrað á þessari stórvelheppnuðu sýningu.  Dómarar voru Höskuldur Jónsson, Stefán Birgir Stefánsson og Þórarinn Ragnarsson. Verðlaunin voru gefin af Kjötvinnslu B. Jensen og skemmtilegt frá því að segja þá var folaldakjöt í vinning í öllum sætum :o)

Úrslitin voru eftirfarandi:

Hestfolöld:
1. Álmur frá Skriðu - Þór og Sigga í Skriðu
2. Miljarður frá Barká - Óli Hermanns og Vignir Ingþórs, Akureyri
3. Þjarkur frá Skriðu - Sigurbjörg Ásta Hauksdóttir og Sverrir Haraldsson

Merfolöld:
1. Leynd frá Litlu-Brekku - Vignir og Jónína, Litlu-Brekku
2. Tildra frá Glæsibæ II - Valgeir Bjarni Hafdal, Glæsibæ II
3. Álfamær frá Barká - Hermann Jónsson og Sigurður Hermannsson, Akureyri

Ef þið smellið á folaldaskrána þá sjáið þið vinningsfolöldin feitletruð í skránni og þar er hægt að sjá nánari ættir.  Folöld skrá.

Ræktunarhátíð Framfara fór fram um kvöldið þann 17. jan. Þar voru ræktendur 14 hrossa heiðraðir og hlutu viðurkenningu fyrir árangur sinn í hrossaræktinni en þeir sem unnu til slíkra verðlauna höfðu ræktað hross sem náðu 8,0 eða hærra í aðaleinkunn kynbótadóms á árinu 2008.  Skemmtilegt kvöld.

30.11.2008
Losun á ungfolahólfi.
Sunnudaginn 30.11. voru ungfolarnir teknir á Staðarbakka.  Folarnir voru 19 (17 veturgamlir og 2 tveggjavetra) en þeir höfðu verið þar frá því 15. júní í sumar. Það var mikið vetrarríki, kuldi og snjór í Hörgárdalnum þennan sunnudag en eigendur hestanna voru mættir á tíma og allt gekk að óskum.

14.08.2008
Reiðnámskeið & Bjargaleikar
Almennt reiðnámskeið á vegum Framfara verður haldið dagana 18. – 22. ágúst n.k. á Björgum. Kennari: Lina Erikson, reiðkennari C frá Hólaskóla Verð kr. 5.000,- pr. þátttakanda. Í lok námskeiðs verður grillveisla fyrir þátttakendur. Tekið við skráningum hjá Önnu Guðrúnu í síma 462-2101/893-9579 og netfang fornhagi@fornhagi.is til og með laugardeginum 16. ágúst.

Firma- og bæjarkeppni Framfara verður haldin á Björgum, laugardaginn 23. ágúst n.k. og hefst kl. 13:30. Keppt verður í eftirtöldum flokkum:
Bænda – karla – kvenna – unglinga – barna og polla. Einnig verður keppt í skeiði.
Skráning á staðnum og fjölmennum nú öll á þennan skemmtilega síðsumarsviðburð.
Ollubúð opin að vanda og góða skapið fæst ókeypis!

Stjórn Framfara leitar eftir myndum frá mótum sem haldin hafa verið á vegum félagsins á Björgum, undanfarin ár. Þeir sem eiga slíkt í fórum sínum, og vilja leyfa félaginu að afrita til gagnasöfnunnar, vinsaml. hafið samband við Önnu Guðrúnu í síma 462-2101/893-9579 eða í netfang fornhagi@fornhagi.is

Hlaut þinn bær/þitt fyrirtæki bikar á síðustu Bjargaleikum? Ef svo, þá erum við í stjórn Framfara á höttunum eftir þessum farandgripum til að veita á komandi Bjargaleikum. Vinsaml. hafa samb. við Hauk í síma 861-0311

08.07.2008
Tenór frá Túnsbergi fór í hryssur í kvöld að Neðri-Rauðalæk.  Tenór hækkaði mikið fyrir hæfileika á LM nú í sumar og fór í 8,78 fyrir kosti og þar af 9,5 fyrir tölt og vilja og geðslag, 9,0 fyrir brokk og hægt tölt.  Hann hefur því hlotið í aðaleinkunn 8,38.  Einnig nýttu tveir Framfarafélagar sér að fara með hryssur undir Leikni frá Vakurstöðum í hólf að Litlu-Tungu.

15.06.2008
Í dag var tekið á móti ungfolum í stóðhestahólfið á Staðarbakka.  Fengu allir veturgamlir hestar þar pláss sem sóttu um.

06.06.2008
Gleðileikar í góðu veðri.
Töltmótið á Björgum var vel heppnað í frábæru veðri.  Á milli 20 og 30 skráningar voru í mótið og var keppt þar í einum opnum flokki.  Sigur úr bítum bar Vignir Sigurðsson á Þráni frá Þinghóli.  Dómarar voru Jónsteinn Aðalsteinsson, Guðjón Guðjónsson og Lina Erikson.  Öll gáfu þau vinnu sína og færum við þeim bestu þakkir fyrir. Úrslit voru eftirfarandi:
A-úrslit:
1. Vignir Sigurðsson og Þráinn frá Þinghóli
2. Viðar Bragason og Sorró frá Hraukbæ
3. Guðmundur Karl Tryggvason og Hrafnar frá Ytri-Hofdölum
4. Þór Jónsteinsson og Panda frá Þrastarhóli (upp úr B-úrslitum)
5. Sigmar Bragason og Sóldís frá Björgum
B-úrslit:
5. Þór Jónsteinsson og Panda frá Þrastarhóli
6. Davíð Sverrisson og Geisli frá Úlfsstöðum
7.-8. Ríkarður Hafdal og Baldur frá Þverá
7.-8. Sigríður Kr. Sverrisdóttir og Gustur frá Hálsi
9. Anna Guðrún Grétarsdóttir og Sól frá Litla-Dunhaga

03.06.2008
Töltmót á Björgum.
Föstudagskvöldið þann 06. júní n.k. verður haldið létt og skemmtilegt töltmót á vellinum á Björgum og hefst það kl. 20:30. Athugið að aðeins verður keppt í einum opnum flokki. Mótið verður kolólöglegt, með einum dómarar og nokkrum keppendum á vellinum í senn
(2-4, fer eftir þátttöku). Tilgangurinn er einungis að þenja kassann, bera sig saman við hina og vonandi að þjálfa bæði hesta og menn í keppni. Leyfilegt að mæta með fleiri en eitt hross til leiks (hver knapi) en hverjum hesti er aðeins leyfilegt að mæta með einn knapa :o) Skráning á staðnum, engin skráningargjöld og eitthvað lítið um verðlaun. Þátttökurétt hafa allir lögbýlingar í Hörgárbyggð og Arnarneshreppi sem og aðrir skráðir félagar í Framfara. Mætum kát og hress á föstudagskvöldið.

03.06.2008
Vantar hross á sölusíðuna - lagt í auglýsingakostnað.
Stjórn Framfara hefur ákveðið að kaupa auglýsingu í næsta Eiðfaxablaði, sem kemur út núna í júní og verður dreift frítt á Landsmótinu. Þetta blað mun einnig berast öllum áskrifendum, aðilum í ferðaþjónustu bænda sem og ræktunarbúum í hrossarækt.  Í auglýsingunni munum við leggja áherslu á sölusíðuna okkar góðu en nú er að lifna yfir hrossasölu og hefur gengið nokkuð vel að selja hross þarna í gegn. Til að síðan okkar verði sem glæsilegust og að við nýtum okkur þessa auglýsingu til hins ítrasta, þá hvetjum við félagsmenn til að kíkja yfir hestakostinn hjá sér og skrá inn á síðuna söluleg hross. Þeir sem áhuga hafa á að skrá hross inn, endilega hafið samband við Önnu Guðrúnu í síma 893-9579 til frekari upplýsinga. Munið að vel tamin hross (eða vel ættuð unghross), góðar myndir og sanngjörn verðlagning er ávísun á árangur.  Verð pr. skráningu er 1.100,-

30.05.2008
Kaffireiðin velheppnuð.
Á föstudaginn síðasta var farin kaffireið frá Skriðu í Mela. Skemmst er frá því að segja að sú ferð heppnaðist mjög vel. Tæplega 60 manns fór ríðandi, einhverjir komu líka akandi og allir nutu glæsilegra veitinga sem Kvennfélagið seldi okkur á Melum. Það var líka ánægjulegt að sjá að nánast allir (ef ekki allir) riðu með hjálm og það er vel. Og þá getum við farið að láta okkur hlakka til kaffireiðarinnar að ári :o)

23.05.2008
Kaffireið í Mela.
Þá er komið að árlegri kaffireið Framfara en farið verður föstudaginn 30. maí n.k. Riðið verður frá Skriðu í Hörgárdal, í Mela þar sem kvennfélagskonur í sveitinni selja okkur kaffi og með því.  Að samsæti loknu er riðið til baka í Skriðu.  Lagt verður af stað kl. 20:00, frá Klambraseli (nýja hesthúsinu í Skriðu) og skal athygli vakin á því að kaffið kostar 1.000kr. pr. mann og að ekki er unnt að greiða með greiðslukortum.  Frítt fyrir 10 ára og yngri.  Munið reiðhjálmana ;o)

20.05.2008
Eindagi árgjalds Framfara.
Í dag er eindagi árgjalds Framfara.  Munið að greiða áður heimsenda gíróseðla til að komast hjá frekari óþægindum.  Athugið að opnaður verður nýr WorldFeng aðgangur á skuldlausa félaga nú í lok maí.

06.05.2008
Stóðhestar Framfara sumar 2008.
Þeir Tenór frá Túnsbergi og Leiknir frá Vakurstöðum verða stóðhestar sumarsins hjá Framfara. 

01.05.2008
Fréttabréf Framfara á öll heimili í Hörgárbyggð og Arnarneshreppi.
Fréttabréf Framfara var á dögunum sent öll heimili í ofangreindum sveitarfélögum.  Með því viljum við vekja athygli á starfi Framfara og hvetja þá hestamenn/ræktendur á svæðinu sem ekki eru þegar í félaginu til að ganga til liðs við það.  Framfari hefur undanfarin ár staðið fyrir fjölbreyttum uppákomum ár hvert svo sem fræðslufundum, reiðnámskeiðum, kaffireið, folaldasýningum, stóðhestaumsjón, firmakeppni, ræktunarhátíð, haldið úti sölusíðu fyrir hross  o.fl. 

28.04.2008
Ungfolaskoðun á Björgum.
Í dag fór fram skoðun á ógeltum ungfolum á Björgum.  Þar mættu 10 stóðhestsefni í eigu Framfarafélaga en dómarar voru þeir Þorvaldur Kristjánsson og Valberg Sigfússon.  Framfari greiddi skoðunargjaldið fyrir hesta sinna félagsmanna, gegn því að þeir sameinuðust á einn stað með hestana.  Stóðhestseigendur fá svo senda umsögn um sína fola.  Vel heppnaður dagur með kaffi og kanilsnúðum og kærar þakkir Bjargarmenn fyrir aðstöðuna ómetanlegu.