|
28.04.2012
Komin lambalykt í húsin! Sjá sauðféð.
13.04.212 TIL SÖLU / FOR SALE
Til sölu Kvaran frá Fornhaga II
Á vef Bergs og Olil á Syðri-Gegnishólum
www.gangmyllan.is má sjá
nýjar myndir af Ljóna karlinum en Kvaran
okkar er einmitt undan honum. Á heimasíðunni er þess getið
að Ljóni sé kominn í mikið stuð eftir að hafa átt við
langvarandi veikindi að stríða á síðasta ári. Hann mætir á
sýninguna Fáka og fjör á morgun í TopReiterhöllinni á Akureyri
og verður spennandi að sjá karlinn. Ljóni verður til
afnota í sumar inni í Eyjafirði á Brúnum hjá Einari Gíslasyni.
Mynd af Ljóna er fengin af vef Gangmyllunnar - takk Olil :o)
09.04.2012
Bastían frá Litlu-Brekku er
skemmtilegur ungfoli sem við eigum með þeim Vigni og Jónínu í
Litlu-Brekku.
Bastían er tveggja vetra nú í vor og því ekki seinna vænna en að
kenna karlinum sitthvað. Þarna er Arnar að blanda saman
leik og kennslu og það þykir þeim brúna skemmtilegt.
Bastían er undan Kvisti frá Skagaströnd (8,58) og Brynju frá
Árbæ (8,14). Hann er brúnnösóttur, leistóttur :o) Bastían er með
122 stig í kynbótamatinu og verður notaður á nokkrar hryssur
búsins í vor.
08.04.2012
Gleðilega páska :o)
07.04.2012
Framkvæmdir. Létum leggja vegarspotta frá hesthúsinu,
norður túnið og út að ræsinu upp til útigangshrossanna.
Vegurinn skilur þá að svæðið á milli íbúðarhússins og
hesthússins og um leið var gert stæði undir hringgerði. Þá
er hægt að fara að skipuleggja endanleg mörk lóðarinnar í
kringum húsið og komið að trjáplöntun og fleiru fíneríi.
Sumarið fer í það!
Nýverið lauk Arnar við smíði á þremur viðbótar stíum í
hesthúsinu og erum við þá núna með 6 stóðhestastíur.
Bastían og Hreimur hafa það gott þarna á stóðhestahótelinu en
þeir yngri Kvaran og Kolbeinn eru að máta nýju stíurnar svona
til að spá í hvort þeir eigi að vera þarna næsta vetur eður ei.
Á myndinni sést í hausinn á Bastían sem skartar þessari nösóttu
snoppu.
06.04.2012
Ívar frá Fornhaga II - 3ja vetra stóðhestur undan Glym frá
Innri-Skeljabrekku (8,38) og Hörku frá Akureyri (8,13) hefur
eignast nýjan eiganda. Ívar var þá um leið skírður Frakkur
og fór því að heiman sem Frakkur frá Fornhaga II. Ívar
(Frakkur) er mikið hestefni, risastór, flugrúmur og
hreyfingamikill. Óskum nýjum eiganda til lukku með folann
og velfarnaðar.
05.04.2012
Hér er mættur Kvaran frá Fornhaga II -
fæddur 2011. Þessi foli er rauðjarpur, risastór og mikill
sláni, kattmjúkur og fluggengur. Kvaran er jafnvígur á
gangtegundir, mikil vekurð og á það til að taka alvöru
skeiðspretti þegar honum liggur mikið á. Hann var
heilrakaður í síðasta mánuði og varð eiginlega litlaus við þá
framkvæmd. En fallegi rauðjarpi liturinn mun væntanlega
koma aftur þegar líður lengra á vorið. Kvaran er undan
Ljóna frá Ketilsstöðum (8,39) og Hörku frá Akureyri (8,13).
04.04.2012
Ævar Ottó stökk á bak Hreimi einn
sólríkan dag um daginn. Hreimur er afar þægur og traustur,
þrátt fyrir ungan aldur, og lét sér fátt um finnast þó að einn
smápatti smellti sér í hnakkinn.
04.03.2012
Mikill vinnudagur í hrossum í dag. Rákum inn stóðið og
klipptum hófa og styttum tögl, tókum folöldin undan (sem ekki
voru þá þegar farin annað) og hófumst handa við að raka þau.
Af þeim 9 folöldum sem fæddust okkur í sumar eigum við 4 eftir.
Þau komu á hús í dag ásamt henni Kamillu sem verður hér í fóðri
fram á vor.
Krít frá Fornhaga II - fædd 2011.
Þarna er hún í dag, nýkomin inn og fór beint í rakstur.
Það er pínu sniðugt hvað hún breyttist við klippinguna...því hún
var óvenju loðin og leit meira út svona eins og spikfeitur
hamstur! En undir hárinu kom í ljós þessi fína hryssa.
Krít er fluggeng og rúm alhliðahryssa með flottan
fótaburð. Hún er afar þæg og traust, faxprúð og algjört
eftirlæti á bænum. Mikið gæðingsefni, undan Hrímni frá Ósi
(8,32) og Söndru frá Hvassafelli (7,81).
Kolbeinn frá Fornhaga II - fæddur
2011. Fékk líka rakstur í dag :o) Kolbeinn er fluggengur
og flottur foli með rúmt og stórt skref. Hann er spakur,
taugasterkur og fljótur að læra. Þessi verður alveg eðall!
Kolbeinn er undan Gígjari frá Auðsholtshjáleigu (8,46) og Fló
frá Akureyri (7,65).
Fleiri rakstursmyndir væntanlegar :o)
14.02.2012
Smellið á myndina til að sjá nánari upplýsingar um mótið.
07.02.2012
Karíus kysstur bless! En í dag flutti hann að heiman og
mun á næstunni fljúga austur um haf. Karíus er undan
Svölu og Hreimi,
folald frá því í sumar. Gríðarlega stór og flottur,
töltgengur með mikinn fótaburð. Nýr eigandi ákvað að
skíra hann upp og heitir hann nú Kveikur frá Fornhaga II.
06.02.2012
Hárprúð tryppi á ferð! F.v. Herkúles frá Pálmholti, Júdit
og Jalda Þorradætur frá Fornhaga..öll fædd 2010 og sú gráa er
Ísöld Tenórsdóttir fædd 2009 líka frá Fornhaga. Herkúles
þennan gaf Lilja Sigurðardóttir Auðuni Orra sl. haust en hann er
gríðarlega stór og fallegur foli, glóbrúnn að lit og mikið
faxprúður.
21.01.2012
Í gær kom stóðhesturinn okkar hann Hreimur
heim úr frumtamingu en hann hefur verið hjá Birni Einarssyni nú
í einn og hálfan mánuð eða svo. Arnar gat ekki stillt sig
um að skella á hann hnakknum og taka stöðuna á karlinum, þrátt
fyrir erfitt færi en mikið hlóðst í hóf. Svo kom risa
jólasnjór (þrátt fyrir að þorrinn sé í garð genginn) og
myndasmiðurinn hljóp í hús. Byrjar vel tamningin á þessum
fola.
01.01.2012
Smellið hér til að skoða fréttir
2011
Smellið hér til að skoða fréttir
2010
Smellið hér til að skoða
fréttir 2009 Smellið hér til að skoða
fréttir 2006-2008 Smellið hér til að skoða eldri
fréttir frá 2006
|
